वाळुज महानगर, (ता.30) – युरेका इन्फोसिस स्कूल, बजाजनगर येथे वार्षिक स्नेहसंमेलन ‘कलायोग 2025-26 बुधवार 24 डिसेंबर रोजी सायंकाळी मोठ्या उत्साहात झाले. याप्रसंगी विद्यार्थ्यांनी सादर केलेल्या कलागुणांनी, सर्जनशीलतेने आणि पर्यावरणीय व सामाजिक जबाबदारीच्या प्रभावी संदेशाने संपूर्ण कार्यक्रम भारावून टाकला.
इकोसत्त्वा एन्व्हायर्नमेंटल सोल्युशन्सच्या संस्थापक व मुख्य कार्यकारी अधिकारी आणि प्रादेशिक शाश्वततेच्या अग्रणी विचारवंत गौरी मिराशी, वडगाव (को.) -बजाजनगर ग्रामपंचायतचे सरपंच सुनील काळे, पंढरपूरचे माजी गौतम चोपडा, सरस्वती कोचिंग क्लासेसचे संचालक सुनील पाडळकर, वेलडन कॉमर्स क्लासेसचे सचिन घुगे, युरेका इन्फोसिस स्कूलचे गौरव लोढा आदींची प्रमुख पाहुणे म्हणून उपस्थिती होती.
कार्यक्रमाची संकल्पना ‘संकल्प – उद्या अधिक चांगले घडवण्याचा शब्द’ प्रत्येक सादरीकरणातून प्रभावीपणे उलगडत गेली. कार्यक्रमाची सुरुवात उत्साही ‘सर्कस थीम’ नृत्याने झाली. त्यानंतर सादर करण्यात आलेल्या ‘होप ’ या नाटिकेतून ‘आपल्या आत असलेली शक्ती’ हा प्रेरणादायी संदेश देण्यात आला. जागतिक पातळीवरील महत्त्वाच्या प्रश्नांवर प्रकाश टाकत ‘हेल द अर्थ ’ या विभागात पर्यावरण संवर्धनावर आधारित प्रभावी नृत्य-गीत सादरीकरण झाले. त्यानंतर विद्यार्थ्यांनी ‘दशसूत्री’ (मानवी जीवनासाठी दहा मार्गदर्शक तत्त्वे) या विषयावर जोशपूर्ण सादरीकरण केले. तसेच ‘सायंस अँड इंनोव्हेशन ’ या सादरीकरणातून भविष्यकालीन तयारीचे दर्शन घडवले.
सांस्कृतिक वैशिष्ट्ये:
विद्यार्थ्यांनी ‘महाराष्ट्राची लोकधारा’ या ऊर्जावान लोकनृत्याद्वारे राज्याची समृद्ध लोकसंस्कृती सादर केली. ‘नवरस’ या सादरीकरणातून भारतीय शास्त्रीय सौंदर्यशास्त्रातील नऊ रसांचे प्रभावी दर्शन घडवले. ‘द ग्रँड कॅनवास ’ या सादरीकरणात कला क्षेत्राकडे पाहण्यातील सामाजिक उदासीनता व आर्थिक असुरक्षिततेविरुद्ध प्रभावी निषेध व्यक्त करण्यात आला.
सामाजिक संदेश:
‘आय टु ऊई ’ (स्वतःपेक्षा समाज महत्त्वाचा), ‘सिव्हिक सेन्स ’ आणि ‘रिस्पेक्ट सॉंग ’ या विषयांवरील नाट्य व गीत सादरीकरणातून शाळेच्या सर्वांगीण विकासाच्या दृष्टीकोनाची प्रचिती आली.
सशक्तीकरण व देशभक्ती:
‘नारी शक्ती’ या सादरीकरणातून महिलांच्या सामर्थ्याचा गौरव करण्यात आला. कार्यक्रमाची सांगता भावनिक आणि देशभक्तीपूर्ण ‘माँ तुझे सलाम’ या सादरीकरणाने झाली.
यावेळी प्रमुख पाहुण्या गौरी मिराशी यांनी विद्यार्थ्यांच्या सखोल विचारसरणीचे आणि गंभीर विषय प्रभावीपणे मांडण्याच्या क्षमतेचे विशेष कौतुक केले. त्यांनी सकारात्मक बदल घडवण्यात तरुण पिढीची भूमिका अत्यंत महत्त्वाची असल्याचे अधोरेखित केले.
याप्रसंगी त्या म्हणाल्या की, “आजचे सादरीकरण केवळ डोळ्यांना सुखावणारे नव्हते, तर आपण समाज म्हणून ज्या बदलांची गरज आहे त्याची प्रभावी मांडणी होती. शाश्वतता, नागरी जबाबदारी यांसारख्या विषयांवरील विद्यार्थ्यांचा ‘संकल्प’ मला प्रचंड आशा देणारा आहे. ‘स्कूल 2050’ या सादरीकरणातून दिसणारी त्यांची दृष्टी खरंच प्रेरणादायी आहे.”
कार्यक्रमाच्या औपचारिक भागात शाळेच्या मान्यवरांनीही मनोगत व्यक्त करत शिक्षक व विद्यार्थ्यांच्या संयुक्त प्रयत्नांचे कौतुक केले.
भावनिक देशभक्तीपर गीत ‘माँ तुझे सलाम’ आणि उज्ज्वल भविष्यासाठी घेतलेल्या सामूहिक संकल्पाने कार्यक्रमाची सांगता झाली. विद्यार्थ्यांच्या कलागुणांनी आणि सामाजिक जाणिवेने पालक व उपस्थित पाहुणे अतिशय प्रभावित झाले.
About Author
