पंढरपूर येथे भीषण अपघात, दर्शनाला जाणाऱ्या महिलांना ट्रकने चिरडले, एक जागीच ठार तर एक गंभीर

वाळूजमहानगर – दर्शनासाठी जाणाऱ्या दोन महिलांना अज्ञात ट्रकने चिरडल्याने एकीचा जागीच मृत्यू झाला. तर दुसरी गंभीर जखमी असून तिच्यावर घाटीत उपचार सुरू आहे. हा भीषण अपघात गुरुवारी (ता.29) रोजी सकाळी साडेसहा वाजेच्या सुमारास वाळुज परिसरातील पंढरपूर येथे झाला.

या अपघाताबाबत मिळालेली माहिती अशी की, सिडको वाळूज महानगर-1 येथील सुभद्राबाई तुळशीराम राऊत व मंगलबाई विठ्ठल शहाणे वय अंदाजे 60 ते 65 या पंढरपूर येथील विठ्ठल रखुमाईच्या दर्शनासाठी जात होत्या. पंढरपूर येथे आल्यानंतर त्या रस्ता ओलांडत होत्या. त्याच वेळी वाळूजकडून औरंगाबादकडे जाणाऱ्या एका भरधाव अज्ञात ट्रकने दोघींना जोराची धडक दिली. गुरुवारी (ता.29) रोजी सकाळी 6.30 वाजेच्या सुमारास झालेल्या या अपघातात मंगलबाई विठ्ठल शहाणे वय अंदाजे 60 ते 65 या ट्रक खाली चिरडल्याने त्यांचा जागीच मृत्यू झाला. तर सुभद्राबाई तुळशीराम राऊत या गंभीर जखमी असून त्यांच्यावर घाटीत उपचार सुरू आहेत. अपघाताची माहिती मिळताच वाळूज एमआयडीसी पोलीस ठाण्याचे पोलीस उपनिरीक्षक राजेंद्र बांगर, पोलीस अंमलदार स्वप्निल अवचारमल, पाटील व पवार यांनी घटनास्थळी धाव घेत सरकारी 108 रुग्णवाहिकेतून जखमी सुभद्राबाई राऊत यांना तर चिरडून ठार झालेल्या मंगलबाई शहाणे यांना पोलिसांच्या वाहनातून घाटी रवाना करण्यात आले. या अपघाताची नोंद वाळुज एमआयडीसी पोलीस ठाण्यात करण्यात आली आहे.

अपघातानंतर ट्रक फरार –
पंढरपूर येथील मुख्य महामार्गावर झालेल्या या भीषण अपघातानंतर अज्ञात ट्रक चालक अपघाताची माहिती न देता किंवा जखमींना उपचारार्थ मदत न करता घटनास्थळावरून फरार झाला. या ट्रकचा शोध घेण्यासाठी परिसरातील सीसीटीव्हीचे फुटेज सहाय्यक पोलीस निरीक्षक मदनसिंग घुनावत खंगाळत आहे.