तालुक्याचा विकास करण्यात बंब अपयशी – डॉ. सुरेश सोनवणे

वाळूजमहानगर, ता.13 – गेल्या पंधरा वर्षापासून आमदार राहिलेले प्रशांत बंब हे गंगापूर शहरात पाच मुतारी बांधू शकले नाही. ते तालुक्याचा विकास काय करणार. त्यामुळे त्यांच्याकडून तालुक्याच्या विकासाची अपेक्षा करणे गैर आहे. असे प्रतिपादन अपक्ष उमेदवार डॉ. सुरेश सोनवणे यांनी संवाद दौऱ्या दरम्यान गंगापूर येथे बुधवारी (ता.13) रोजी केले.

गंगापूर शहरांमध्ये अपक्ष उमेदवार डॉ सुरेश सोनवणे यांनी बुधवारी (ता.13) रोजी वेगवेगळ्या ठिकाणी भेटी दिल्या व मतदारांशी संवाद साधला. यावेळी शहरातील मुख्य बस स्टँडची दुरावस्था झाली असून पूर्ण शहरांमध्ये पंधरा वर्षांमध्ये पाच सुलभ शौचालय आमदार बांधू शकले नाही. लाडकी बहीण योजनेचा गाजावाजा करणाऱ्या आमदारांनी आपल्या मतदार संघातील लाडकी बहिणीच्या इज्जतीबाबत आणि सुरक्षेबाबत विचार करणे गरजेचे असताना निवडणुकीच्या तोंडावर लाडकी बहीण योजनेतून तालुक्यातील महिलांना मोठा लाभ झाला असा गाजावाजा करत आहे. सरकारी योजना ह्या आपल्या हक्काच्या असतात परंतु मुख्य सुविधा देणे त्यासाठी निधी आणणे हे आमदाराचे काम असते. परंतु मागील पंधरा वर्षात प्रशांत बंब हे या कामात सपशेल अपयशी ठरले आहे. निवडणुकीच्या तोंडावर गावागावात विकासाची गंगा आणल्याचा दावा करत आहे. हे फक्त पैसे कमावण्यासाठी राजकारण करतात. पैसा कमवायचा त्या बळावर निवडणूका लढवायच्या आणि पाच वर्ष मतदारसंघात फिरून देखील बघायचं नाही. ही यांची काम आहेत त्यामुळे आता योग्य वेळ आहे तुमच्यासमोर पर्याय आहे योग्य विचार करून मतदान करा. असे आवाहन अपक्ष उमेदवार डॉ. सुरेश सोनवणे यांनी यावेळी केले. प्रसंगी मोठ्या संख्येने नागरिक उपस्थित होते.