ट्रॅक्टर व स्कुटीच्या धडकेत महिला जागीच ठार, ए.एस. क्लब उड्डाणपुलावरील घटना

वाळूजमहानगर, ता.3 -भरधाव जाणार्या विना क्रमांकाच्या ट्रॅक्टरने स्कुटीला पाठीमागून जोरात धडक दिल्याने झालेल्या अपघातात मागे बसलेली महिला जागीच ठार झाली. ही घटना धुळे-सोलापूर महामार्गावरील ए.एस.क्लब च्या उड्डाणपूलाजवळ मंगळवारी (ता. 3) सकाळी 10.30 वाजेच्या सुमारास घडली.

याबाबत पोलिसांकडून मिळालेली माहिती अशी की, जयश्री लहु भड (30) रा. मारेगाव, ता. जि बीड ही महिला कल्पना सुपेकर रा. समर्थनगर सिडको वाळूज महानगर या मैत्रिणीकडे राहण्यासाठी आली होती. दरम्यान, मैत्रीणीचे पती सुहास सर्जेराव सुपेकर व जयश्री भडे हे दोघे मंगळवारी सिडको वाळूज महानगर येथून मोपेड (एम़एच 23,एव्ही-3351) ने सोलापूर-धुळे महामार्गावरून पैठण रोडवरील जिल्हा कृषी विज्ञान केंद्र येथे प्रशिक्षण घेण्यासाठी जात होती.

दरम्यान, ए. एस. क्लब येथील उड्डाणपूलावरून खाली उतरत असताना, पाठीमागून भरधाव आलेल्या ट्रॅक्टरने स्कुटीला पाठीमागून जोरात धडक दिली. या अपघातात जयश्री या मोपेडवरून खाली पडल्याने ट्रॅक्टर ट्रॉलीच्या मागील चाकाखाली सापडल्याने डोक्याचा चेंदामेंदा होऊन ठार झाली. तर सुहास सुपेकर हा किरकोळ जखमी झाला.

अपघाताची माहिती मिळताच वाहतूक शाखेचे पोलीस व एमआयडीसी वाळूज पोलीस ठाण्याचे पोलीस उपनिरीक्षक गिरी आदींनी घटनास्थळी धाव घेत अपघातग्रस्त वाहने बाजूला करून वाहतूक सुरळीत केली. या प्रकरणी एमआयडीसी वाळूज पोलीस ठाण्यात ट्रक्टर चालक दादा चांगदेव राठोड रा.आखदवाडा, ता़ खुलताबाद़, जि छत्रपती संभाजीनगर याच्याविरूध्द गुन्हा दाखल करण्यात आला आहे.