छोटा हत्तीच्या धडकेत शाळकरी मुलगा ठार

वाळूज महानगर – भरधाव जाणाऱ्या एका छोटा हत्ती या चारचाकी वाहनाने सायकलवरून घरी जाणाऱ्या शाळकरी मुलास जोराची धडक दिल्याने तो गंभीर जखमी होऊन ठार झाला. हा अपघात गुरुवारी (ता.29) रोजी सायंकाळी वाळुज महामार्गावरील अब्बास पेट्रोलपंपा जवळ झाला. सकाळी दर्शनासाठी जाणाऱ्या एका महिलेला ट्रकने चिरडल्यानंतर सायंकाळी झालेल्या या अपघातात ठार झाला. या दोन्ही अपघातामुळे सिडको वाळूज महानगर परिसरात शोककळा पसरली आहे.

याविषयी मिळालेली माहिती अशी की, सिडको वाळूज महानगर येथील साऊथ सिटी, आदर्शनगरात संभाजी बोनाकुडले हे कुटुंबासह राहतात. त्यांचा लहान 14वर्षीय मुलगा अजय हा बजाजनगर येथे इयत्ता 8 वी च्या वर्गात शिक्षण घेत होता. गुरुवारी (ता.29) सायंकाळी 5 वाजता शाळा सुटल्यावर अजय हा बजाजनगरातून सायकलवर औरंगाबाद-नगर महामार्गाने साऊथ सिटी येथील घरी जात होता. सायंकाळी 6 वाजेच्या सुमारास पंढरपूरकडून औरंगाबादकडे भरधाव जाणाऱ्या छोटा हत्ती या चारचाकी (टाटा एस) ने अजयला पाठीमागून जोरात धडक दिली. या अपघातात अजय हा गंभीररित्या जखमी झाला. त्याला वाहनधारक व नागरिकांनी बेशुद्धावस्थेत उपचारार्थ घाटीत दाखल केले असता डॉक्टरांनी तपासून मयत घोषित केले. या प्रकरणी संभाजी बोनाकुडके यांच्या तक्रारीवरून वाळूज एमआयडीसी पोलिस ठाण्यात गुन्हा दाखल करण्यात आला आहे.

सिडको वाळूज महानगरात शोककळा –
गुरुवारचा दिवस हा सिडको वाळूज महानगर येथील नागरिकांसाठी दुःखाचा ठरला. याच परिसरातील दोन महिला गुरुवारी सकाळी पंढरपूर येथे दर्शनासाठी जाताना ट्रकने चिरडल्याने एकीचा जागीच मृत्यू झाला. तर दुसरी उपचार घेत आहेत. याच दिवशी सायंकाळी सहा वाजेच्या सुमारास छोटा हत्ती या चारचाकी वाहनाने शाळकरी मुलास धडक दिल्याने तो ठार झाला. एकाच दिवशी झालेल्या या दोन्ही घटनांमुळे सिडको वाळूज महानगर परिसरात शोककळा पसरली आहे.